ELF dodaqları = Seductive və Party Pink!

Hə, əzizlərim, nəhayət, 2-ci ELFimin də gəlməsi ilə aldıqlarımı sırayla sınaqdan keçirməyə başladım bu həftə və sıra ilə görüb yaşadıqlarımı sıra ilə sizlərə çatdıracam:) təbii ki, əvvəlcə əlim pomadalara uzandı:D Beləcə qarşınızda, ELF normal seriyadan olan Seductive (Başdan çıxaran) və ELF mineral seriyadan olan Party Pink (Şənlik Çəhrayısı)! Qablaşdırmaları bax beləcədi (Seductive-inkini söküb dağıtdım:D)

Normal seriyadan 1.50 funt sterlinqə aldığım Seductive və 3.50 funtluq Mineral party pink!

Seductive-dən başlayaq. İsti tonlu çəhrayı və kremli olan bu pomadanı ilk dəfə açdığımda şirin qoxu ətrafı bürüdü. Şirin vanil mi desəm, şəkər mi desəm, xoş iy verir, nyam nyam! Əvvəl çətinliklə çəkilirdi, amma çantada qala-qala yumşaldı və daha sözə baxan olub:) Rəngini çoox yaxşı verir! Ürəyim getdi bu rəng üçün! Qalıcılığı da deyim elə-belə deyil, dünən dərsə gedəndə çəkdim və 3 saatdan sonra gələndə hələ də dodaqlarımda çəhrayılıq qalmışdı. Hələ tez-tez yeniləsək, ohoo! ELFin normal seriyasından gözüm Classy və Fantasy-də qalıb, görüm neynirəm:D

Mineral seriyasından olan Party Pinkə gəlincə, saytda görən kimi, dedim "Bəbişim, mənim olmalısan!" Əsl istədiyim rəng bax budu! Nə narıncı, nə çəhrayı, nə yalın. Dodağa ilıq çəhrayı-narıncı rəng verir və çəkilməsi Seductive-ə görə daha çox kremli və rahatdı. Mineral olduğu üçün də paraben, prezervativ və bu kimi şeylər yoxdu tərkibində. Qutusu da super! Sadə və şıq! Nələri istəmirəm ki bu seriyadan, imkan olsa, hamısını ələ keçirəcəm bir pomada kolleksioneri olaraq:D

Svoçlarından da gördüyünüz kimi, Party Pink daha kremli və zərifdi, Seductive isə rəngdə daha əladı. Baxın əzizlərim, sizə hansı tipli pomadalar daha xoşdursa, sınaqdan keçirin. Almağa dəyər pomadalardı, hər dəfə ELF-dən sifariş verəndə mütləq bir dənə pomada atıram səbətimə:D Buradan və buradan ELF pomadalarına baxa bilərsiniz. Yeri gəlmişkən, diqqət yetirdiysəniz, Gypsy əksikdi:D Onu açmağa qıymadım və sizlərə saxladım, canlarım. Sürprizlə qarşınızda olacam yaxınlarda :) Öpüldünüz:*

2-ci ELF sifarişim! :D

Nəhayət dünən 2-ci ELF sifarişim gəldi:D Həmişəki kimi 1 həftəyə əlimdədi! Gördüyünüz cicilər: ELF Get The Look - Glitz and Glam dəsti, ELF Get The Look - Smokey Eyes dəsti, normal seriyadan pomada Gypsy və Seductive, ELF studio fırça şampunu, ELF mineral pomada - Party Pink, ELF studio krem göz layneri - bənövşəyi, ELF normal seriyadan Shimmer Eyeliner Pencil (Parlayan göz qələmi) - Boldly Bronzed (Cəsur bürünc), ELF normal seriyadan Brightenening eye color (parladan göz kölgəsi) - Butternut (Fındıq yağı) və ELF Christmas Face - Üz Spreyi! Bir sözlə, söküldüm:D Aldıqlarımdan istifadə edib qısa zamanda təqdimatlarla qarşınızda olacam. O vaxta kimi, özünüzə gözəl baxın, qızlar ;) Muaahh :*

E.L.F. Kosmetikası = Natural Radiance Ənlik + Göz Astarı və Göz Layneri + Göz qapağı astarı + Minerallı Üz Astarı

Aman Allahım! Bu kosmetikanı kəşf etdiyimdən bəri elə hey alıram! Allah axırını xeyir elesin, sökülmüşəm:D Bu yaxınlarda yaman çox E.L.F yazıları görəcəksiniz:D 

E.L.F. haqqında bir az danışım. Amerika Birləşmiş Ştatlarının buraxdığı Eyes Lips Face yalnız Veb sayt vasitəsilə ucuz və eyni zamanda, rəqabətə davamlı məhsullarını satmaqdadır. Amerikada "1 dollarlıq kosmetika" kimi bilinən bu marka Birləşmiş Krallığın saytında 1.50, 3 və 3.50 funt sterlinq qiymətinə Avropaya, eyni zamanda, Türkiyə və Azərbaycana satılır, minlərlə sevəri də var. Geniş məhsul çeşidinin ucuz olmasına baxmayaraq (marka ucuz olmasının səbəbini məhsullarının qablaşdırmasına xüsusi bəzək vurmaması ilə əlaqələndirir), bir çox böyük firmalarla rəqabət edə bilir. Elə isə gələk mənim ilk E.L.F. sifarişimə:D 2 həftəyə çatdı əlimə.

 Soldan sağa ELF peşəkar seriyasında Natural Radiance Blusher (ənlik), ELF Eye primer and Liner Sealer (Göz astarı və layner yaradan), ELF eyelid primer (göz qapağı astarı) və Mineral İnfused Face Primer (Minerallı Üz Astarı). Bu cicilərə göndərmə pulu ilə 16.45 funt sterlinq ödədim. Pis deyil. Aşağıda da qutudan çıxmış formaları:

Başlayaq, 1.50 funtluq göz qapağı astarından. 

Göz kölgəsinin uzun müddət gözdə qalması, təkcə onun piqmentliliyindən və toxumasından asılı deyil. Yaxşı astar kölgənin uzun müddət və öz rəngində qalmasını təmin edir, bir neçə saat sonra belə kölgə uçub getmir. Düzü, ELF-in bu eyelid primer dediyi astarı elə də super deyil, kölgənin ömrünü uzadır, amma qələmin yox:D Qabından azacıq çıxarıb göz qapaqlarına çəkib əlimlə yayıram (fırça ilə də edə bilərsiniz), sonra göz makiyajımı edirəm. Bir az iyi qəribə gəlmişdi ilk dəfə açanda, amma sonra öyrəşdim deyəsən:D Aşağıdakı svoçda sol tərəfdə astarsız, sağda isə eyelid primer-lə çəkdiyim Arezianın qəhvəyi kölgəsini görürsünüz:

İndi keçək, 3.50 funtluq ELFin studio seriyasından aldığım göz astarım və maye layner yaradanıma.

Gördüyünüz pomadaya bənzər tərəfi astardı. Yenə eyni qaydada çəkirəm, amma bu astar yuxarıda bəhs etdiyim digər astardan daha zəifdi, elə-belə yüngül makiyaj - nə bilim, dənizə gedib edəndə makiyaj çəkmək istəyirsinizsə və ya "astarın olması astarsızlıqdan yaxşıdı" deyib kölgənizi bir az vurğulamaq istəyirsinizsə, işinizə yaraya bilər. Aşağıdakı svoçda solda eye primer və sağda astarsız çəkdiyim Arezia qəhvəyi kölgəmi görə bilərsiniz. Elə çox fərq yoxdu, hə? (Kompüterim də fondadı:D - Rek-lam-lar:D)

Line sealer dediyimiz maye layner yaradandan isə hələ istifadə etməmişəm, düzü, maye laynerdən istifadəyə hələ risk eləmirəm:D Edincə, geniş təcrübəmi sizə yazacam. İndi gələk 6 funtluq minerallı üz astarına.

Ümumiyyətlə, markaların minerallı məhsullarından istifadə etməyə çalışın, çünki onlarda paraben kimi dəriyə ziyanlı maddələr olmur. Adətən, digər seriyalardan daha bahalı olur, amma neynəmək olar, hərdən bir az artıq pul ödəmək lazımdı. Üz astarına gəlincə, üz astarlarının məqsədi üzü hamar və qüsursuz makiyaja hazırlamaq, tonal kremin rahat çəkilməsini təmin etmək və dərini qorumaqdır (makiyajın da uzun müddət qalmasını təmin edənlər də var). Bu üz astarından belə istifadə edirəm: üzümü yaxşıca yuyub nəmləndirdikdən sonra, azacıq miqdarda (hələ bu şəkildə çox qoymuşam) əlimə vurub bütün üzümə yayıram, bircə damcısı bəsdi ki, bütün üzə çatsın, çox çəksəm, üzümü yağlı hiss etdirir - ona görə, əgər yağlı dəriniz varsa, ya çalışın bu məhsulu almayın, alsaz belə, çoox az çəkin, çünki həddini aşanda üzünüzə yağ çəkmiş kimi hiss edəcəksiniz:D Belə rəngsiz olması da əladır. Makiyajı də çox yaxşı saxlayır, 6 saatdan sonra belə tonal kremim olduğu kimi qalır, hamar görünür dərim. Mən kifayət qədər məmnunam və bitincə, yenə almağı düşünürəm.

Nəhayət, son məhsulumuz - ELFin peşəkar seriyasından 1.50 funtluq Natural Radiance Blusher - Glow (təbii parıltı ənliyi - parla) ilə qarşınızdayam.

Gördüyünüz kimi, narıncı rəngli ənlik xəstəliyim burda da davam edir:D Xəfif parıltılı (daha doğrusu, işıqlı) narıncı-çəhrayı ənlik cıpcıqqılıdı, amma rəngini yaxşı verir, elə piqmentli deyil, ilk dəfə fırçanı vurarkən, o dəqiqə toz-toz olmuşdu, bir az ehtiyatla işlətmək lazımdı. Bundan vurğulayıcı (highlighter) kimi almacıq sümüklərimin altına nazik xətt kimi istifadə edirəm adətən və kölgə verirəm. Qalıcılığı ortadı, 6 saata bir şey qalmır amma:D Yaz günlərində xəfif makiyaj üçün yaxşı işə yarayır. Aşağıda da barmaqlarımdakı svoça baxa bilərsiniz:

Hə, əzizlərim, bu da mənim ELF təcrübəm. Əgər siz də, ucuz qiymətə kifayət qədər yaxşı məhsullar almaq istəyirsinizsə, eyeslipsface.co.uk saytına baş çəkin. Azərbaycana da məhsul göndərir;) Feysbukda da izləyərək, ELF Cosmetics fan səhifəsi hər 5000 layk qazandıqdan sonra təmin etdiyi kupon kodlarından yararlanaraq, pulsuz göndərmə və ya 20% tam endirim əldə edə bilərsiniz. Hal-hazırda, 130,000 layk əldə etdiyi üçün ELF aldığımız bütün məhsullara 20% endirim təklif edir: sadəcə, səbətinizə məhsulları atdıqdan sonra kupon kodu yerinə PERFECT20EU kodunu daxil edin, göndərmə yeri kimi European qeyd edin və O-lala:D Təklif sabah səhər 9-a kimi (İngilitərə vaxtı ilə) sona çatır. Mübarəksiniz, canlarım:) Mucuklar:*

Aura Kosmetikası: Meyvəli ənlik - şaftalı fışıltısı

Cheapsmells faciəsi haqqında bu yazımda danışmışdım. Birinci sifarişlərim gəlib çatmamış şaftalı rəngli Aura ənliyini görüb, tezz aldım. Cici qutusunda gəldi:

Qutunu açdıqda, iyrənc Aura makiyaj astarı təcrübəmə əsaslanaraq, ümidlərimi kəsmişdim. Amma bu ənlik məni yanıltdı. Əsl istədiyim rəng və piqmentliliyə malikdir:

Fləşlə çəkdim ki, içində azacıq parıltıları görə biləsiniz. Balaca olsa da, rəngi elə yaxşı verir ki, uzun müddət istifadə edəcəyimə əminəm. Fırçanı xəfif batırmaq bəs edir. Gördüyünüz rəng bir az tünd görünür, amma mərcani-portağal rəngindədir. Golden Rose terracottamdan sonra bu şirinə də sevimlimə çevrildi. Qiyməti də çox ucuz idi, 2-3 funt sterlinqə olardı, indi cheapsmellsdə görmədim, hər halda, qısa zamanda gətirilər. Aşağıda əlimi bir dəfə vurmaqla alınan rəngi göstərirəm:

Almacıq sümüklərinə paylayaraq, təbii utancaq (!) görünüş yaratmaq olur. Dərimin rəngi bir az tünd olduğundan çəhrayı ənliklər məndə çooox süni durur, onun üçün belə şaftalılar blushing effect (utancaqlıq effekti) yaratmaqda birəbirdir:D Neçə vaxtdı, bu günəşli yaz günlərində əlim bu ənliyə gedir ^^ Bəs siz Aura kosmetikasından nəyisə sınaya bilmisinizmi? Nələri tövsiyə edərdiniz?

iherb alış-verişim = Queen Helene nanəli üz maskası + Hugo Naturals bədən losyonu

Soyuq qışdan çıxdıqdan sonra, makiyaj və sairə demişkən, üzə əməlli-başlı qulluq etməyin vaxtı çatıb. Qışda çox maskadan istifadə etmədim, amma yazda mütləq lazımdı - artan günəş dərimizi yaxşıca zədələyir:/ İnternetdə araşdırarkən, iherb.com deyə bitki özlü, vitaminlərdən tutmuş nə bilim saf bitki köklərinə kimi hər şeyi uyğun qiymətə satan, Türkiyə və Azərbaycana sifariş göndərə bilən saytı kəşf etdim! 28 fevralda verdiyim sifariş 10 gün sonra əlimdə idi. Pis deyil. Bu da içindən çıxan dəriyə qulluq vasitələrim:

Əvvəla, yaxşı qablaşdırılmışdı. Losyon və maska nə axmışdı, nə də dağılmışdı. Keçək məhsullara:

Queen Helene nanəli maska haqqında Vespa Girl Makeup blogunda oxumuşdum. Elə onun sayəsində bu möhtəşəm saytı kəşf etdim! Mənim kimi qarışıq/yağlılığa meylli dərisi olanlar üçün yaradılıb elə bil! Üzərində də yazılanlara görə, civzələri, qara nöqtələri təmizləyir, məsamələri kiçildir. Hələ 2 həftədi istifadə edirəm, qlobal dəyişiklik hiss etməmişəm:D Amma üzü tərtəmiz edir, qara nöqtələrimdə azacıq azalma var;) Üzə çəkdikdən sonra 15 dəqiqə gözləyirəm, quruyur və pambıqla silə-silə yuyuram. Dərimi dərindən elə təmizləyir ki, həmin gün ərzində heç bir yağlılıq hiss etmirəm, nəfəs alıram rahatca:D Nanəli olması üzü xəfifcə yandırır, amma dözmək olur:D İndi bunu həftədə TBS çay ağacı maskası ilə növbələşdirərək 2 dəfə tətbiq edirəm. Qiyməti çox yaxşıdı, 3.83 ABŞ dolları, özü də yekədi, 226qr:D Ehtiyata yığmağı düşünürəm. Queen Helene-nin palçıq və üzüm toxumu maskaları da var, onları da ələ keçirməyi planlayıram:D

Maska almışkən, dedim, bədən losyonlarına bir göz atım. Gördüyüz Hugo Naturals markalı, vanil və portağal qoxulu (mmmm, dadlıdı!) 236ml-lik üz və bədən losyonunu alıb atdım zənbilimə. O qədər sevdim ki bunu! Məhsul təptəzədi! Qoxusu da portağal qabıqlarından bişirilən vanilli tort kimidi! Nəmləndirməsi də qənaətbəxşdi! Toxuması çoox yumşaqdı, ağırlıq yaratmır dəridə. Heç bir qaşıntı yaratmadı. Üzümə də rahatlıqla çəkirəm. The Body Shop losyonları ilə başa-baş gedir! Qiyməti 9.99 ABŞ dollarıdı. Yenə də alacam böyük məmnuniyyətlə.

Ümumilikdə, iherb.com sevimli məkanıma çevrildi. Facebook-da da səhifəsinə qoşula bilərsiniz. İlk alış-verişinizdə  ADO390 kupon kodunu daxil etsəniz, 5 ABŞ Dolları endirim də əldə edəcəksiniz! Fürsəti qaçırmayın, qızlar;) Gözəl qalmanız diləyilə...

The Body Shop Vanil seriyası

Əzizlərim, bu gün Ankarada hiss edilməyən Novruz havası ilə sizlərə yazıram. Səmənisiz keçən ilk Novruzda və blogger hələ açılmadığından, DNS parametrləri ilə oynaya-oynaya yeni bir yazıyla qarşınızdayam:) Bir aydan qabaq The Body Shoplarda Vanil seriyasında 2 al 1 ödə kampaniyası vardı və çoxdaandı, istədiyim ciciləri aldım:

Gördüyünüz sağdakı Vanil bədən buğu, soldakı isə Vanil EDT ətridi. İkisinə 34.90TL ödədim. Sırf vanil qoxusu əvvəl vuranda təbii ki, ağır gəlir, lakin qaldıqca şirin, eyni zamanda, cazibədar qoxu yayır. Optimal istifadəsi duşdan sonra bədən buğunu bütün bədənə püskürtmək, ətri isə boyun, qulaq arxasına sıxaraq, uzun müddət getməsini təmin etməkdi. Ətrin balaca olması çantada rahatlıqla daşınmasına imkan verir. Siz də bir az ağır, bir az cazibədar qoxu istəyirsinizsə, sınamağa dəyər. Gecə görüşlərə gedərkən istifadəsi məsləhətlidi;) Novruz bayramınız da mübarək olsun! :)

Avon aksesuarları: Beata çanta + fırçalar + üzük

Çoxdandı fırçalarımı yeniləmək istəyirdim və Avonun 3-cü kataloqundakı endirimli fırçaları qaçırmaq istəmədim. Elə gəlmişkən, 10TL-ə bu şirin çantanı da aldım, üzük isə laap çoxdankı Avon bazarlığımdan qalmadı. Aksesuarlardan danışmışkən, onu da əlavə etdim:D

Avon fırçalarını çox sevirəm! Çox yumşaqdı, üzü incitmir və tüklərini tökmürlər. Yumaq da rahatdı. Qiyməti də münasibdi, başqa nə istəyək:D Aşağıdakı şəkildə, soldakı ikiuclu göz kölgəsi fırçası, sağdakı isə tonal krem fırçasıdı. Göz kölgəsi fırçası göz qapağına kölgəni çəkmək üçün uyğundur, konturlamaqda da istifadə edilə bilər, çox toppuş deyil. Digər ucundakı süngəri isə kölgəni dağıtmaq üçündü. Tonal krem fırçası isə inanılmazdı! Tonal kremi özündə saxlamır, azacıq tonal krem bəsdi ki, bütün dəriyə yaysın. Gördüyünüz kimi, işlətmişəm, hələ yumamışam amma:D

Aşağıdakı göz kölgəsi fırçası (yaxından): Qiyməti 3.00TL

Bu da, tonal krem fırçası (yaxından): Qiyməti 4.80TL.

Aşağıdakı cicilər də əsl bahar dəbinə uyğun cıqqılı çantam və şirin güllü üzüyüm:D

Bəs sizin sevimli Avon aksesuarlarınız hansıdı? Nələri tövsiyə edərdiniz?

Suyadavamlı gel göz layneri EG09 Parlaq ağ - ebay alış-verişim

Kompüterin qabağında otura-otura onlayn alış-verişə yaman aludə olmuşam. Xoşuma gələn çox şeyi demək olar ki, almışam, indi də qənaət etməkdən dağılıram:D Keçən həftələrdə ebay.com saytından gel göz layneri axtara-axtara tapıb aldım. 6.49 dollara və pulsuz göndərişlə əldə etdim bu cıqqılını:

Cəmi 3 qramdı, amma gel toxumalı olduğundan uzun gedəcəyini gözləyirəm. Parlaq, şəffaf ağ rənglidir və barmağımla göz kölgəsi astarı kimi göz qapaqlarıma və göz bulağıma çəkirəm. Effekti super! Təəsüf ki, göz makiyajımın şəkillərini bəzi səbəblərdən qoya bilmirəm bura, amma bu göz layneri ilə bir səviyyə artmışam göz makiyajımda:D Layner olduğundan, göz layneri fırçanızla kirpik xəttiniz boyunca da çəkə bilərsiniz. Xəfif işıltı verəcək. Xumar (smokey) göz makiyajı yaratmaqda əladır - qara gecə paltarı + xumar göz makiyajı, çəhrayı pomadaa O_o Adı-familiyası təəssüf ki, yoxdur bu göz laynerin. Elə ebay-dəki celia-makeup mağazasından ala bilərsiniz. Fərqli rəngləri də var, amma astar kimi istifadə etməyi düşünürsünüzsə, bu EG08 sizin üçündür.

Əlimdəki fləşsiz çəkdiyim svoçdan parıltılar yaxşı görünmür, amma zərli ağlı görünüş verir. Tək problemi - təbii ki, astar kimi uzun müddət sabit qalmır. Mənim kimi, yağlı göz qapaqları olanlara bildirilir! :) Öpücüklər:*

Oriflame dodaqları - Power Shine + Very Me Oh My Gloss + Very Me Clickit

Ankaraya yağan ağır qara görə və boynumu incitdiyimdən blogumdan bu qədər uzaq qalmışdım, əzizlərim. Nəhayət ki, yeni yazılarla qarşısınızda olacam:) Bu gün sizə Oriflame-dən aldığım dodaq məhsullarından danışmaq istəyirəm. Yəqin ki, Power Shine pomadalarını nə qədər çox sevdiyimi bilirsiniz. Endirimdəykən, 2-ci katalogundan 2 dənəsini - Pink Elixir və Hot Peach aldım. Çoxdandır ki, very me clickit dodaq parıldadıcısını və rəngləndiricisini də sınaqdan keçirmək istəyirdim. Elə Very me Clickit dodaq parıldadıcısından Baby Pink, dodaq rəngləndiricisindən raspberry (moruq) olanını aldım. Bir də, Very me Oh My Gloss meyvəli parıldadıcılardan Naughty makiyaj çantama daxil oldu:D

Əvvəla, ilk başdakı yemiş qoxulu Power Shine cicilərindən başlayaq.

Həmişəki kimi, rəngini inanılmaz dərəcədə yaxşı verir və dodaqları nəmli saxlayır. İçindəki kiçik parıltılar dodaqları zərli göstərir, gün işığında par-par yanırsan:D Pink Elixir yeni favorimə çevrildi, xüsusi günlərimdə istifadə edirəm. Amma yenə də bir mənfi cəhəti də uzun müddət qalmamasıdı. Sınadım, yeyib içmədən 3 saat qala bilir dodaqda. Tez-tez yeniləmək lazımdı. Amma buna dəyər məncə :D Bunları mən Azərbaycan kataloqundan hərəsini hardasa, 6 manata almışdım. Bu qiymətə görə kifayət qədər yaxşıdı.

Gördüyünüz bu cici də Very me Oh my gloss parıldadıcısıdı. Oriflame-in gənclər üçün buraxdığı Very me seriyasını çox sevirəm! Hər məhsulunu sınaqdan keçirməyə cəhd edirəm və hələ ki, razı qalmadığım olmayıb:D Bu parıldadıcı da 6 rəngdən ibarətdi, məktəbdə oxuyarkən hələ bunlardan istifadə edirdim. Kataloqda görüb duyğulandım yaman :D cəmi 3-4 manata olan bu şirinə yaxşı tünd çəhrayı rəng verir və dodaqları qurutmur, nəmli göstərir. Endirimə girməsini gözləyirəm ki, yenilərini ala bilim:D

Nəhayət, Very me Clickit dodaq parıldadıcı və rəngləndiricisi! 2.99 manata aldım hər birini və rəngləndirici xüsusilə, könlümü oxşadı! Rəngini özünüz nizamlaya bilirsiniz, dodağınıza xəfif çalar da verə bilərsiniz, tünd çəhrayılıq da. Dadı da şirindi ^_^ Rəngləndirici olduğundan, normal pomadaya görə daha uzun müddət qalır. Üstündən parıldadıcı da çəksəniz, həm rəngli, həm parıldayan olursuz. Amma ikisinin də mənfi cəhəti yapışqanlıq hissi verməsidi. Parıldadıcıdan elə çox şey gözləməyin. Sadəcə, nəmli göstərsin dodaqlarımı, parıldatsın, həm də ucuz olsun deyirsinizsə, bu, sizin məhsulunuzdur. Bir sözlə, Oriflame hamımızı düşünüb - parlaqlıq istəməsəniz, rəngləndirici bəsinizdi, yox, parlaq dodaqlar favorinizdirsə, parıldadıcı ilə dodaqlarınızı tamamlayın. Ortada konnektoru da yaxşı düşünüblər - bitişdir, at çantana, nə vaxt lazım olsa, tezbazar çək, çıx - əsl gənc malı:D Aşağıda da svoçları görürsünüz - pomadalardakı parıltıları göstərmək üçün fləşlə çəkdim. 

Soldan sağa - Power Shine Pink Elixir, Power Shine Hot Peach, Very me Oh my Gloss - Naughty, Very Me Clickit parıldadıcı - Baby pink, Very Me Clickit dodaq rəngləndirici - Raspberry. Yəqin ki, Oriflame-də əl çəkə bilməyəcəyim şey varsa, o da pomadalarıdı. Bəs əzizlərim, sizin sevimli Oriflame pomadalarınız hansılardı?

Cheapsmells.com həqiqətən ucuz iy verir :/

Mdaa... Minlərlə alıcısı olan cheapsmells.com saytını da sınaqdan keçirmək istədim. Nə Ankarada, nə də Bakıda tapılan, ucuz qiymətə marka çeşidinə sahib olan və İngiltərədə yerləşən bu onlayn kosmetika mağazası haqqında çox müsbət şərh oxumuşdum və nəhayət ki, hər şeyi burdan ala biləyəcəyim hissinə qapıldım, amma yanılmışam:/ 18 fevralda verdiyim sifariş 4 martda əlimə çatdı:

Qutunu nə qədər sıx bağlamağa çalışsalar da, krem makyaj astarım axıb qabını bulaşdırdı və bütün həvəsimi öldürdü. Tonal kremdən yanıqlı olduğumu bilirsiniz, bu səbəbdən, Stila SPF 15 müdafiəli rəngli nəmləndirici - Yalın (Bare), Mayfair Lələk Sonlu bərk pudra - orta yalın və Aura Kosmetikasından tonal krem astarı - çəhrayı çalarını almışdım. Göndərilmə məbləği ilə birlikdə, mənə 14.74 funt sterlinqə başa gəldi, hardasa, 16 manat edir.

Gördüyünüz sarı qutudakı Aura Kosmetikasından makyaj astarıdır. O qədər pis qablaşdırılıb ki, qapağını da bulayaraq axıb tökülüb. Həm də, bu qutunun da niyəsə şəffaf sellofanla bağlanmamasına təəccüb edirəm.

Teksturası da iyrəncdi və qəribə iy verir. Deyəsən, köhnə məhsuldu. Qapağını yuyub təmizləyəndə güclə yuyub çıxartdım, hətta əlimdə çəhrayı izlər hələ də qalmışdı. Fuuu!

Gördüyünüz isə Mayfair pudrasıdı. Yığcam pudraya ehtiyacım vardı və 2.45 funt sterlinqə olan bu pudranı qaçırmaq istəmədim, amma heyif... Təsvirində yazılana görə, xoş qızılgül iyi verməli idi, amma elə iyrənc qoxuyur ki, elə bil illərlə qalmış, iylənmiş ətirdi O_o bu qədər iyrəncini görməmişdim, onu necə üzümə vura bilərəm ki? Rəngi də bir ton açıqdı mənə görə...Təəssüf ki, bu məhsul da ümidimi doğrultmadı və zibil qutusuna gedəcək.

Bu üçündən ən babatı elə Stilanın rəngli nəmləndiricisi oldu. Rəngli nəmləndiricilər tonal kremə yaxşı alternativdi. Üzü mənim kimi yağlı/qarışıq olan xanımlar bu tip nəmləndiricilərlə üzlərini işıqlandırmadan, yağlı göstərmədən rahat makiyaj edə bilərlər. SPF-li olması da günəşin ziyanlı işıqlarından dərini qoruması deməkdir (üzümdəki ləkələrin məhz günəşdən qaynaqlandığını 2 gündür ki kəşf etmişəm. SPF-lilərə hücuuumm:D). Deyəsən, alsam-alsam, ancaq bu məhsulu alaram. Amma çətin ki, Cheapsmellsdən T_T

Beləcə, onlayn alışverişdə bu satıcıya bir quş qoyuruq. Mənim müşahidəmə əsasən, məhsulları köhnədi, ya da istifadə müddətinə az qalıb. Amma yenə də sınaqdan keçirmək istəsəniz, cheapsmells.com saytına baş çəkə bilərsiz. Həm Azərbaycana, həm də Türkiyəyə məhsul göndərir. Amma Gözəllik Salonunun tövsiyə etmədiyi saytların siyahısına (qara dəftər :D) daxil oldu :/

Maybelline Define-A-Lash Həcm Tuşu

Əvvəlki postlarımda da qeyd etdiyim kimi, tuşum çürüməyə üz tutmuşdu. Mən də tuşsuz qalmayım deyə (Flormarım bacıma getdi:D) otaq yoldaşımın məsləhəti ilə Maybelline-dən almağa qərar verdim. 15 TL verdiyim çox bahalı olmayan Define-a-lash üstündə yazılanı kifayət qədər sübut etdi:

Tuşda axtardığım şey kirpiklərimi yapışdırmaması və tək-tək ayırmasıdı. Digər xüsusiyyətlər elə də əhəmiyyət kəsb etmir. Bu tuşu da bu adla aldım və doğrudan da, əyilib-düzələn, elastik fırçası ilə kirpikləri bircə zərbədə ayırır və uzadır. Gözlərim BÖM açılmış kimi görünür və çox xoşuma gəlir bu effekt:D rəng verməsi də ortadır.

Fırçası toppuş deyil, xırda tükləri kirpikləri yapışmağa qoymur. Normal qiymətə belə xüsusiyyətlərə malik tuş istəyirsinizsə, almağa dəyər. Düzü, Bakıda hələ görməmişəm, amma görən olsa, mütləq bildirsin. Böyük kəşf olar:D Uğurlar olsun;)

The Body Shop 2011 yaz kolleksiyası

BƏLİ! Gözlənilən an gəldi! Martın ilk günü və od çərşənbəsinin sevinci ilə sizə TBS-dən xəbər gətirmişəm. The Body Shop Londonun Moda Kolleci ilə işbirliyi sayəsində yaradılmış məhdud buraxılış olan "Moda ilə Fırçala" ("Brush with Fashion") yaz kolleksiyasını artıq satışa buraxdı. Keçən həftə artıq Türkiyədə də TBS mağazalarında bu şirinələr görünməyə başladı. Təbii, saf və keyfiyyətli xam maddələrdən hazırlanan və heyvanlar üzərində test edilməyən TBS-lər həmişəki kimi böyük marağa səbəb oldu.

Digər kolleksiyalarda olduğu kimi çox məhsuldan ibarət olmayan "Moda ilə Fırçala"nın qablaşdırması Londonun Moda Kollecinin istedadlı tələbləri tərəfindən hazırlanmış və işləri bəyənilmişdir. Aşağıdakı şəkillərdə bu kolleksiyanın göz kölgə dəstini, üz astarını və yanaq rəngləndiricisini;

burda isə dodaq baxım məhsullarını - fırçalı dodaq parıldadıcılarını görə bilərsiniz.: çəhrayı Krem 01 və Şirəli Ərik 11.

Şirindilər, elə deyilmi?:D Yaz bitmədən bunları sınaqdan keçirməyi çox istəyirəm. Ümidvaram, nəsib olar və sizə gözəl bir postla geri qayıdaram;) Hələlik isə özünüzdən muğayat olun ;)

P.S. Şok bir xəbərdən sonra özümə gəlməyə çalışıram. Türkiyə hökümətinin verdiyi qərar görə, artıq bütün blogspotlar bağlanacaqmış. Çox təəssüf edirəm... Əgər bir gün blogumu oxuya bilməsəniz, bunun səbəbi aydındı artıq...