The Body Shop Vanil seriyası

Əzizlərim, bu gün Ankarada hiss edilməyən Novruz havası ilə sizlərə yazıram. Səmənisiz keçən ilk Novruzda və blogger hələ açılmadığından, DNS parametrləri ilə oynaya-oynaya yeni bir yazıyla qarşınızdayam:) Bir aydan qabaq The Body Shoplarda Vanil seriyasında 2 al 1 ödə kampaniyası vardı və çoxdaandı, istədiyim ciciləri aldım:

Gördüyünüz sağdakı Vanil bədən buğu, soldakı isə Vanil EDT ətridi. İkisinə 34.90TL ödədim. Sırf vanil qoxusu əvvəl vuranda təbii ki, ağır gəlir, lakin qaldıqca şirin, eyni zamanda, cazibədar qoxu yayır. Optimal istifadəsi duşdan sonra bədən buğunu bütün bədənə püskürtmək, ətri isə boyun, qulaq arxasına sıxaraq, uzun müddət getməsini təmin etməkdi. Ətrin balaca olması çantada rahatlıqla daşınmasına imkan verir. Siz də bir az ağır, bir az cazibədar qoxu istəyirsinizsə, sınamağa dəyər. Gecə görüşlərə gedərkən istifadəsi məsləhətlidi;) Novruz bayramınız da mübarək olsun! :)

The Body Shop 2011 yaz kolleksiyası

BƏLİ! Gözlənilən an gəldi! Martın ilk günü və od çərşənbəsinin sevinci ilə sizə TBS-dən xəbər gətirmişəm. The Body Shop Londonun Moda Kolleci ilə işbirliyi sayəsində yaradılmış məhdud buraxılış olan "Moda ilə Fırçala" ("Brush with Fashion") yaz kolleksiyasını artıq satışa buraxdı. Keçən həftə artıq Türkiyədə də TBS mağazalarında bu şirinələr görünməyə başladı. Təbii, saf və keyfiyyətli xam maddələrdən hazırlanan və heyvanlar üzərində test edilməyən TBS-lər həmişəki kimi böyük marağa səbəb oldu.

Digər kolleksiyalarda olduğu kimi çox məhsuldan ibarət olmayan "Moda ilə Fırçala"nın qablaşdırması Londonun Moda Kollecinin istedadlı tələbləri tərəfindən hazırlanmış və işləri bəyənilmişdir. Aşağıdakı şəkillərdə bu kolleksiyanın göz kölgə dəstini, üz astarını və yanaq rəngləndiricisini;

burda isə dodaq baxım məhsullarını - fırçalı dodaq parıldadıcılarını görə bilərsiniz.: çəhrayı Krem 01 və Şirəli Ərik 11.

Şirindilər, elə deyilmi?:D Yaz bitmədən bunları sınaqdan keçirməyi çox istəyirəm. Ümidvaram, nəsib olar və sizə gözəl bir postla geri qayıdaram;) Hələlik isə özünüzdən muğayat olun ;)

P.S. Şok bir xəbərdən sonra özümə gəlməyə çalışıram. Türkiyə hökümətinin verdiyi qərar görə, artıq bütün blogspotlar bağlanacaqmış. Çox təəssüf edirəm... Əgər bir gün blogumu oxuya bilməsəniz, bunun səbəbi aydındı artıq...

2010-cu ildə dərimin sevdikləri :)

Hə, 2010-cu ildəki sevimli makiyaj məhsullarımdan sonra indi növbə ötən ildə dərimə etdiyim qulluq zamanı sevimlimə çevrilən cicilərdədi. Hazırsınızsa, başlayaq ;)

Qısa bir ön söz deyim. Ümumiyyətlə, əgər dəri gözəl və sağlam deyilsə, ən bahalı makiyajın belə köməyi olmayacaqdır (olsa belə, uzun müddət davam etməyəcəkdir). Üzdə civzələr ola-ola ona qulluq etmədən makiyajla ört-basdır etməyə çalışmaq dərini heç cür yaxşılaşdırmır, əksinə, vəziyyətini pisləşdirə bilər. Bu məntiqlə yola çıxaraq, yeniyetməlikdən bu yana dərimin nələr çəkdiyini anladım və ona əlimdən gəldiyi qədər qulluq etməyə çalışıram.

Təmizləyici gel, losyon və tonik: 2010-cu ildə heç bir gel, losyon və ya tonik ümidlərimi doğrultmadı. Garnier-ə ümid edirdim, amma dermatoloqum yazdığı dərman preparatlarından başqa gel istifadə etməməyimi tövsiyə etdi. Odur ki, bir paket Garnier təmizləyici gel, losyon və tonikim istifadə edilmədən qalıb şkafda. Odur ki, 2010-cu ilin sevimli geli, losyonu və toniki yoxdur:D

Üz kremi: Üzüm yağlı/qarışıq tip olduğundan, nəmləndiricidən az istifadə etməyə çalışıram. Ən az gündə bir dəfə bəs edir. Hamamdan çıxandan sonra mütləq üzə nəmləndirici çəkmək lazımdır ki, hamam istiliyinin dərini qurutmasının qarşısını alsın. Bu il sevə-sevə istifadə etdiyim üz kremim Arnaud İnstitut Hydra Touch nəmləndiricisidir. Sağ olsun, İdeal mağazasının satıcısı məsləhət gördü və yaxşı da eləyib:D Bu nəmləndirici krem dərini kifayət qədər nəmləndirir; üzündə narahatedici təbəqə hissi duymursan və dərinin nəfəs aldığını hiss edirsən. Yağlı/qarışıq dərili adamları narahat edəcək qədər nəmlilik yaratmır. Keçən ilə bu kremi 15 AZN-ə almışdım, 50 ml-dir. Artıq dibinə çatmağa az qalıb:( Bakıya gedən kimi ehtiyatımı doldurmalıyam. Ya da TBS-in nəmləndiricilərini sınaqdan keçirəcəm.

Duş geli: Düzünü desəm, hamamda fərqli qoxular hiss etməyi sevirən, odur ki, sabit, daim istifadə etdiyim duş gelim yoxdur. Lakin 2010-cu ildə hansı duş geli əvəzedilməz oldu - deyə soruşsanız, TBS-in duş gellərini qeyd edərdim, xüsusilə, TBS Neroli Jasmin duş geli inanılmaz hisslə bürüyür insanı. Duşdan heç çıxmaq istəmirəm... Amma təbii ki, bu geli xüsusi günlərə saxlamışam, çünki cəmi 200 ml-di. Qənaət edirəm:D

Bədən losyonu: Əlbəttə ki, bədən baxımını da unutmaq olmaz. Keçən il ilk dəfə bədən losyonundan istifadə etməyə başladım, çünki dərimin duşdan sonra nəmə ehtiyacı olduğunu indi hiss edirəm (ya da son vaxtlar bədənimə daha çox fikir verməyə başlamışam). Hər halda, TBS-lə başladım bədən baxımında bu ilin sevimli bədən losyonu təbii ki, TBS Spiced vanilla oldu. Bir dəfə The Body Shopdan istifadə edəndən sonra çeşidli və orijinal qoxular arasında seçim etməkdə çətinlik çəkəcəksiniz, mənim kimi:D

Makiyaj təmizləyicisi: Əlbəttə ki, bir tələbənin ən yaxşı makiyaj təmizləmə dostu makiyaj təmizləmə salfetləridi:D paket-paket bitirdiyim bu salfetlərin markasına heç vaxt baxmıram:D Amma L'orealın buraxdığı Olay markalı göz makiyajı təmizləmə kremi ilə tanış olana kimi, bu salfetlərdən başqasını tanımırdım. Belə ki, nə qədər ağır makiyaj etsəm də, bu kremin bircə pırtı bəsdi ki, gözlərimi tər-təmiz etsin. Qoxusuzdur və ağ rənglidir. Tək mənfi cəhəti, gözə düşdükdə göynətməsidi, onun üçün kremi pambıqla silərkən, diqqətli olmaq lazımdır.

Depilyasiyon baxım: Yeniyetməlikdən bu yana bu tük çıxartma məsələsi bir problemdi, depilyasiyadan sonra dəriyə qulluq ayrı problem:/ İllərdir depilasiya üçün Veet kremindən istifadə edirəm və ötən il də, sadəcə, epilyasiya aləti almaqla, bir az krem alma tezliyimi azaltmış oldum, amma yenə də kremdən əl çəkə bilmirəm. Veet kreminin hər depilyasiya kremində olduğu kimi, mənfi cəhəti tükləri uzun müddət yox edə bilməməsidi. 3-4 günə tüklər əvvəlki performansına yiyələnirlər:D Veet depilyasiya zolaqları isə gözlədiyimdən yaxşı çıxdı və ilin sevimlisinə çevrildi. İstifadəsi rahat, təmizdi. Üzümdəki artıq tükləri həssas dərilər üçün olan zolaqlarla alıram və foto epilyasiyaya getməyə ehtiyac qalmır:D Aşağıda sağda gördüyünüz Veet kremi isə depilyasiyadan sonra istifadə üçündür. Qıcıqlanan, qızaran yerlərə çəkməklə, rahatlanmaq olur. 2010-un kəşfi və sevimlisi də bəhz Veet depilyasiyadan sonra baxım kremidir.

Ayaq baxımı: Yenə 2010-cu il ayağıma qulluq etməyə başladığım ilə çevrildi və Orifleymin ayaq kremi ilə ayağın da dincəlmə haqqı olduğunu anladım:D Düzdü, məndə tərləmə əleyhdarı ayaq kremidi, amma ayaqlarımı eyni zamanda, nəmləndirir. Ayaq kremində bu ilin kəşfi və sevimlisi olaraq Orifleymin tərləmə əleyhdarı ayaq kremini elan edirəm:D

Əl baxımı: Əlimə nə desəz, çəkirəm. Krem 21-dən tutmuş Garniere, Orifleymdən tutmuş TBS-ə qədər hər şey. Sabit deyiləm bu mövzuda. Əslində, əlim çox həssasdır, bir az soyuq olan kimi qızarır və qabıq verir, krem seçərkən, əslində, diqqətli olmalıyam O_o 2010-cu ildə istifadə etdiyim və "yenə də alaram" dediyim əl kremim isə The Body Shop Spiced Vanilla əl kremidi. Gözləmədiyim qədər nəmləndirir və ən vacibi, əli uzun müddət nəmli saxlayır. Bacım çox bəyəndi, ona bağışladım. Amma ümid elirəm, cicimi yenə TBS mağazalarında görə biləcəm...

Bax belə:) Bu da mənim 2010-cu ildə kəşf etdiyim və ya sevimlimə çevrilən dəriyə qulluq məhsullarım. Nə demək olar, ümidvaram, 2011-ci il daha bərəkətli və fərqli markalarla dolu keçər;) Daim yeniliklərlə dəyişikliyə doğru;)

2010-cu il makiyaj sevimlilərim!

Bəli, Sevgililər gününə az qalmış artıq yenə Ankaradayam:) Fürsət varkən, gec də olsa, sizlərlə 2010-cu ildə sevə-sevə istifadə etdiyim ve yanımdan ayırmadığım, rahatlıqla tövsiyə edəcəyim makiyaj məhsullarımdan danışmaq istəyirəm. 

Tonal krem: düzü, tonal kremdə hələ də ürəyim istəyəni tapmamışam və fərqli markalardan istifadə etməyi xoşlayıram. Amma mütləq və mütləq bir yerdə qərar tutmaq lazımdı:/ çünki tonal kremi düzgün seçmək və üzümüzün onu qəbul edə bilməsi çox vacibdir. İl boyu istifadə etdiyim tonal kremlərdən Bourjois-nın maye tonal kremindən razı qaldım. Mənimki açıq rəngli idi və dərimin nəfəs almasına imkan verirdi. Sadəcə, tonal kremlərdəki o qoxunu heç sevmirəm, Bourjois-nın bunda günahı yoxdu vallah:D bəlkə ona görə də bu tonal kremlərdə qərar tuta bilmirəm. Amma nə demək olar, 2010-un tonal krem gözəlçəsi bu oldu:)

Pudra: Elə də çox pudra istifadə etmədiyim üçün bu il ancaq Flormarın pudrası ilə Arezia dəstimin pudrasından istifadə etdim və Areziankından razı qaldım:D Flormarınkı üzdə maska kimi görünürdü. Arezianınkı isə daha xəfif və yüngüldü. Bu pudraya baxmaq üçün Arezia haqqında olan yazıma keçə bilərsiniz.

Ənlik: Həə, bax bu, başqa məsələ. Top ənlikləri çox sevirəm, çünki dərinin təbii rəngini gücləndirir və süni görünmürlər. Bu il həm terracotta, həm də top ənlikdə Golden rose ümidlərimi doğrultdu. Top ənlikləri yaxşı, təbii rəng verir, terracotta star dust ənliyi isə gecə makiyajımın ayrılmaz hissəsinə çevrilib. Golden rose terracotta ənliyi haqqında yazıma buradan baxa bilərsiniz.

Göz qələmi: karandaş kimi göz qələmlərinə üstünlük verənəm, çünki dərim yağlı olduğundan, maye qələmlər gözümdən axır (yəqin tanış mənzərədi xD). Odur ki, bu il çox fərqli markalarda göz qələmi istifadə etdim, ən xoşuma gələn - axmayan, daha çox qalıcı və gözü yandırmayan PUPA markasının 09 nömrəli qara göz qələmidi.  Digər ucunda isə çəkilən xətti yaymağa imkan verən fırça kimi başlığı vardır. Yeyib-yeyib sonuna gəlmişəm artıq yazığın :D Ondan sonra aldığım nə Flormar, nə Orifleym onu əvəzləyə bilmədi. Odur ki, 2010-un sevimli göz qələmi PUPA elan olunur :)

Tuş: tuşa gəlincə, yenə də fərqli marka tuşları sınaqdan keçirməyi sevirəm. Bu il Bourjoisdan tutmuş Flormara kimi çox markadan istifadə etdim, lakin İsaDora markasının Lash Booster Mascara qara tuşdan əl çəkə bilməyəcəyimi anladım. Bir ildən çoxdur ki (!) məndədi və artıq qatılaşmağa başlayıb və kirpiklərimi artıq yapışdırır (tuşu hər 4-5 aydan bir dəyişmək lazımdı, mənim kimi eləməyin O_o). Amma neyləyim ki, əlim gəlmir atmağa. İsaDora tuşunun bircə zərbəsi bəsdir ki, kirpikləri uzatsın və həcm versin. Ayırmağı da yaxşıdı. Fırçasının formasından da bunu görə bilərsiniz. Ən qısa zamanda İsaDora ehtiyatımı doldurmalıyam;) Hələlik dünən Maybelline-dən aldığım tuşu sınaqdan keçirəcəm, onun haqqında yeni yazımı gözləyin;)

 

Göz kölgəsi: Gözlərim ətli olduğundan, ümumiyyətlə, kölgədən az istifadə etməyə çalışıram, çünki kobud görsənir. Bu il ancaq Arezianın göz kölgəsi palitrasından və Orifleymdən aldığım qələm göz kölgəsindən istifadə etdim. İkisi də qənaətbəxş nəticə yaradır, amma Orifleymin Very me qələm göz kölgəsi mənim üçün yaradıldığından, ondan əl çəkə bilməyəcəyimi anladım:D Bu qələmin verdiyi rəng və işıq əsl istədiyim kimidir, qalıcılığı 6 saatdan çox olur və çəkilməsi rahatdır. Doymuram da bundan, neyləyim:D Məhdud buraxılış olmasına baxmayaraq, yenə onu çıxaracaqlarına ümid edirəm O_o 2010-un sevimli Orifleym qələmi haqqında burdakı yazımdan oxuya bilərsiniz.

Dodaq boyası: Ən sevdiyim mövzu:D Dodaq boyalarına gəlincə, nələrdən istifadə etmədim kiii! Stik pomadalardan 2010-un sevimlisi Oriflame Power Shine Festive pomadalarıdı. İndiyə kimi, bu qədər rahat çəkilən, işıq və rəngi çox gözəl verən və kobud qalmayan pomadam olmamışdı! Hər kataloqda mütləq bir dənə Power shine alıram:D Bu yazımda, Power Shine Festive haqqında oxuya bilərsiniz.

Dodaq parıldadıcısına gəlincə, 2010-da sevə-sevə istifadə etdiyim və dibinə daş atdığım yenə Bourjois Effect 3D Max parıldadıcılarıdı. Dünən YKM-də Bourjoislarda 50% endirim vardı, çox xərc elədiyimdən ala bilmədim, amma qısa zamanda cicilərə qovuşacam;)

Dodaq balzamı: Təbii ki, The Body Shopun dodaq balzamları 2010-cu ilin bir nömrəli balzamlarıdı! Düzdü, dodaqlarım çox qurumur, amma bu şirin dadlı, qoxulu və nəmləndirici balzamlar dodaqlarımı rahatlandırmağa və nəmli görünməyə imkan yaradır. TBS balzamlarını istifadə etdikdən sonra dodaq balzamı xəstəsi olacaqsınız:D TBS balzamları haqqında oxumaq üçün buraya tıqtıq;)

Dodaq kremi: Bourjois So Delicate dodaq kremini istifadə etməzdən qabaq, ümumiyyətlə, dodaq kreminin varlığından xəbərim yox idu. Xəfif rəng verən bu krem tutqun görünüş yaradır və dodaqları qurumaqdan qoruyur. Yenə də dibinə çatdığım bu dodaq kremi 2010-da istifadə etdiyim yeganə dodaq kremi olmasına baxmayaraq, sevimlimə çevrilə bildi;)

Bu da son:) 2010-cu ildə sevə-sevə istifadə etdiyim və əl çəkə bilmədiyim makiyaj məhsulları haqqında fikirlərimi sizlərlə bölüşdüm. Bəs sizin 2010-cu il sevimliləriniz hansılardı? 2011-də nələrdən əl çəkə bilməyəcəksiniz?:)

The Body Shop məhsul təqdimatı!

dBu günü The Body Shop günü elan edirəm:D "The Body Shop nədi? Bunu hardan tapıb çıxartın?" deyirsiniz yəqin. Bakıda olmayan bu markanın dəriyə qulluqdan tutmuş makiyaj məhsullarına kimi bir sıra məhsul çeşidi var. Ağlı başdan çıxaran bədən yağları (?) bütün dünya xanımlarının sevimlisidi (amma mən hələ onları sınaqdan keçirməmişəm xD) Ankaraya gələndən oxuduğum forumların birində eşitdim TBS-i (The Body Shop). Dedim eləməyim tənbəllik, görüm nə olan şeydi bu. Oktyabrdan bu günə sadəcə bədən losyonu ilə başlayan TBS macəram, üz maskasına kimi davam elədi:D İndi də endirimləri gözləyirəm ki, ətirlərindən alım ^_^

Burda mənim favorilərimdən spiced vanilla (ədviyyatlı vanil) və cranberry (quşüzümü) seriyasını görürsünüz. Dəhşət nəmləndirici keyfiyyətlərinə malik spiced vanilladan fərqli olaraq, cranberry ƏSL PARLADAN LOSYONdu! O_o Çiməndən sonra bütün bədənə çək, bəh bəh! parlayırsan:D Ürəyim getdi, hətta bacıma da aldım, Bakıya qayıdanda verməyə ~_~

Yeni favorim mənim: Neroli Jasmin seriyası. 2 al 1 ödə kampaniyası vardı, eləmədim tənbəllik, bədən spreyi (solda) və duş gelini aldım. Əvvəl qoxusu ağır gəlir, amma sonra elə bir qoxular cənnətindəsən! Yasəmən, vanil, müşk, nə gözəl şey var hamısı içində:D Duj geli ilə duş qəbul edib spreyi püskürüb hər tərəfə yasəmən iyi verirsən:D (TBS saytında nətər yazmışdı: Neroliya şahzadəsi yasəməndən öz sevgilisini cəzb etmək üçün istifadə edirmiş :D). Yeri gəlmişkən, bədən spreyinin üstünə "üstün cəzbetmə qüvvəsinə malik" yazılıb :D

Çay ağacı üz maskasııı və çay ağacı yağı!Yağlı və ləkəli dərilər üçün nəzərdə tutulub! Nəticələrini növbəti postlarda yazacam ;)Oriflame-in çay ağacı seriyasına çox oxşayır, çay ağacı yağından istifadə etmişdim, dərimi sakitləşdirirdi. Eyni effekti verir, sadəcə TBS yağı daha güclü iyə malikdi. Belə bir şey axtarırsınızsa, yoxlayın məncə;)

Vəə ən yeni aldıqlarım: Satsuma parladan dodaq balzamı və Spiced Vanilla dodaq balzamı!Bu qədər nəmləndirən balzam istifadə etdiyimi xatırlamıram! TBS mağazalarında xoşuma gələn xidmətlərdən biri də sınaqdan keçirmək üçün məhsulların təmin edilməsidir. Hər məhsul seriyasının yanında, üstünə "Deneyin" yazan bir məhsul mütləq var. Bu balzamlar şirin dadır və gözəl qoxuları var. Hər çantada mütləq olmalı!Bir dodaq baxım məhsulları xəstəsi olaraq, bütün TBS balzamlarını sınaqdan keçirmək qərarını vermişəm:D

İndi isə gələk qiymətlərə: Spiced vanilla, cranberry və jolly orange seriyalarında 2 al 1 ödə dekabrın sonuna kimi davam edəcək. Bu seriyalarda losyonların qiyməti hardasa 24 TL-di, tam xatırlamıram. Amma parladan losyon cranberry 27 TL idi. Neroli Jasmində də o vaxt 2 al 1 ödə vardı, 24 TL ödədim jel və spreyə. Satsuma dodaq balzamı 8.90TL, cranberry balzamı isə 14 TLdi. Rəfiqənizlə 2 dənə alsaz. 7 TL-ə başa gələcək;)

TBS-in kampaniyalarına bura tıklayıb baxa bilərsiniz. Yeni il Hədiyyə dəstlərində də 3 al 2 ödə davam edir;)

P.S. Bilirəm, Bakıda yaşayan oxucularım hardan alacaqlarını bilmirlər. Kaş Bakıda da olsa bu mağaza... Malları pendir-çörək kimi alınar ee:D Bizim bazarı bunlar hələ yaxşı tanımırlar;) Bəlkə bizim parfümeriyalarımıza təklif irəli sürək, hm? Siz nə düşünürsünüz?